May 4, 11

Baxdıqlarımdan: “Kaybedenler kulübü”

Əvvəlcədən deyim, film məndə təəsürat yarada bildi. Filmin kinomatoqrafiya tərəfini, peşəkar təhlilini bu postdan gözləməyin, daha diqqətəlayiq “resenziya” üçün biraz səbr edib, kinoklik`də çıxacaq yazını gözləyin. Ordakılar işin içindədir.

Uzatmıram, film barədə ona görə yazdım ki, filmə baxmağı məsləhət görənlər arasında mən də olum. Məndə filmə maraq musiqisini facebookdakı hansısa dostumun paylaşmasından sonra yaranmışdı. Sonra treylerinə baxdım və məntiqi sonluq –  filmə baxdım. Saytı da var, özünüz üçün kino barədə nəsə kəşf eləmək istəsəniz.

Film ona görə xoşuma gəldi ki, heçnə tələb eləmir… tamamilə heçnə… Sadəcə rahatlayın və baxın. Mən bu filmə kinoteatrda baxsam məncə indi aldığım ləzzəti ala bilməzdim. Filmdə indiyə qədər eşitdiyim “ən mənalı mənasız sözlər” var idi. İki dostun, həmsöhbətin, “dərvişin” söhbətləri.

Filmin qısa(alınmayan) xülasəsi: Amerikan filmlərindəki yalnız “cowboy”lar kimi özlərini daxilən yalnız hiss edən iki R.J. – Kaan və Mete – gecə saatlarında radio efirindən ağızlarına və ağıllarına gələni danışırlar. İki dostun təkbətək söhbəti kimi. Ona görə söhbətlərində və hərəkətlərində heç bir senzura yoxdur. Hər şeydən danışa bilirlər, mövzuları əlaqəsiz olaraq bir-birinə calayıb, dəyişə bilirlər. Onlara “pop culture” əleyhdarları, kütləviləşmiş hər şeyə “yad” olan adamlar kimi baxa bilərsiniz, amma onlar heç bu da deyillər. Heçnə etməyə can atmırlar, həyatınızı dəyişəcək dərin mənalı mesajlar vermirlər, sizə nəsə demək də istəmirlər. Hər şeyi olduğu kimi qəbul eləməyin, hərşeyin öz axarında getməsinin tərəfdarıdırlar. İstədikləri vaxt, istədiklərini edirlər.

[ Continue reading… ]

April 27, 11

“Adam dili” – Həyatın bir anı silsiləsindən

tarix üçün qeyd: 288 nömrəli avtobusda işdən yorğun və xəstə evə gəlirəm. Anası və nənəsi bir-birindən 1 cərgə aralı məsafədə tək yerli oturacaqlarda oturmuş balaca dəcəl oğlan ayaq üstə və həmçinin camaatın ayağının üstündə, aləmi bir-birinə qatır. O dar yerdə o tərəf bu tərəfə hərəkət edir, qışqırır, hamıya “ilişir” və onsuzda çox narahat olan “səfərimi” daha dözülməz edir.

Valideynləri sadəcə müşahidə etidiyinə görə vəziyyətin normal olmadığını onlara necəsə çatdırmaq istədim. Axırda dözə bilməyib son dayanacağa yaxınlaşanda (red: özümü sığortalamaq üçün son dayancaqda dedim ki, yoxsa qanqaraçılıq olsa yol daha da dözülməz olardı =)… ) məsafəcə mənim olduğum yerə daha yaxın olan yerdə əyləşmiş nənəsinə müraciət elədim:

[Mən] – Maşallah, nəvənizdir? Allah saxlasın

[O] – Hə, çox sağol (təbəssümlə)

[Mən] – Dil bilir?

[O] – Hə əmisi, türkcə bilir, məktəbdə də ingiliscə öyrədirlər..

[Mən] – Bəs adam dilini bilir?

[O] – Necə yəni? (təəccüblə)

[Mən] – Bayaqdan eləmədiyi qalmayıb, bəs bir şey deyin də….

avtobusdakıların üzündə təbəssüm və mən pulu verib avtobusdan düşürəm…

April 24, 11

Baxdıqlarımdan: “Water for elephants” filmi

Dünən qabaqcadan planlaşdırılmamış bir şəkildə kinoteatrda istirahət etdim. Kinonu kinoteatrda baxmağı sevənlərdənəm açığı. Afişalara yaxınlaşıb filmlər arasından bu filmi seçd(ik)im. Kino müddətində ən çox xoşuma gələn kinoteatrın atmosferi və kinoya birlikdə baxdığım kompaniya oldu, filmin özü xoşuma gəlmədi. Afişada filmləri qiymətləndirərkən İMDB xalını mütləq nəzərə almaq lazımdır fikrini bu film sayəsində özüm üçün təsdiqlədim.

Filmin qısa xülasəsi: Valideynlərini itirmiş gənc veterenarlığa namizəd Jacob keçmişindən qaçarkən, təsadüfən «Benzini Brothers» sirkinin qatarına minir və sonrakı həyatında sirkin əsas ulduzu/aktrisası olan Marlena-ya aşiq olaraq, “alkaş” bir filə baxıcılıq edərək keçirəcəyi hadisələrin başlanğıcına düşür. Filmin yaxşı tərəfi odur ki(!), sujet xətti səni çox içərisinə çəkmir və popcorn yeyib, sok içməyə mane olmur =)

Sözümün canı: Bu tip filmlər məni cəlb eləmir bir o qədər də. Bəzi anlarda yandakı zalda gedən “Rio“da nələr baş verdiyini düşünmürdüm desəm yalan olar.  Bu filmi uşaqlıqdan sirk dünyasının sehrinə aludə olmuş adamlar bəlkə də maraqla qarşılayacaq, amma məni bu aləm heç vaxt cəlb eləməyib…

April 22, 11

Görünməmiş wi-fi.. və ya, “Görməmiş” wi-fi

Oxatan`dan bu yana online olaraq blog postlarla nədənsə şikayət etdiyim uzun zaman olmuşdu. Mən dilimi dinc saxlamağa çalışsam da görünür yaranan vəziyyət buna imkan verməyəcək. Yazıma uzun-uzadı giriş vermədən mətləb haqqında sizi agah eləmək istəyirəm: “dava internet davasıdır”. Əslində davanın mənbəyi internetdən başlasa da problem xidmət anlayışının olmamasındadır. Bu postu Weboxu`da yazmamağıma səbəb mənim bu dəfəki internet davamın provayderlərlə filan deyil, şəhərin müxtəlif məkanlarında yazılan “Wi-fi zone” işarəsinin gözlədiyimi verməməsidir. Yəni bu dəfə xidmət sferasının başqa sahəsində olan çatışmamazlığı yazmaq istədim. Əslində mütəmadi olaraq bu barədə narazılığımı FacebookTwitter`dəki statuslarımdan hiss eləmək olar. Bu barədə fikirlərimi ətrafımdakılara deyəndə məsələnin təkcə mənə yox, başqalarına da qaranlıq qaldığını gördüm. Ola bilsin ki, mən məsələyə səhv tərəfdən baxıram kimsə bu restoran və əyləncə sferasında işləyirsə bəlkə məntiqli bir izahla məni və mənim kimi narazı insanları məsələnin iç üzündən agah edə bilər.

Getdiyim yerlərdə internetdən istifadə etmə istəyim yeni-yeni qoşulduğum Foursquare şəbəkəsinə üzvlüyümdən sonra meydana gəlməyə başladı. Şəbəkənin iş prinsipi belədir ki, getdiyiniz yerlərdə “check-in” edirsiniz və həmin yer barədə fikirlərinizi və məsləhətlərinizi dostlarınızla paylaşırsınız ki, dostlarınız həmin yerdə olanda əgər birinci dəfə gəliblərsə həmin yer haqqında təsəvvürləri olsun və nə sifariş etməli, nə yeməli, nəyi sifariş etməməli olduqlarını öz dostlarından öyrənsinlər. Əcnəbi ölklərdə təbii ki, bu şəbəkəni biznes müəssələri və xidmət sferasının peşəkarları daha məqsədəuyğun və yararlı istifadə edirlər, amma bu başqa mövzunun yazısıdır. Bizdə isə nəinki sosial medianı istifadə etmək ağıllarına gəlmir hətta necə yaxşı xidmət etmək olar barəsində də təsəvvürləri yoxdur.

[ Continue reading… ]

April 7, 11

Yoxlama yazısı: “Music is everywhere” concept

Bu yazı əslində blogun redizayn mərhələsində yoxlama xarakteri daşıyır. Amma son zamanlar qarşılaşdığım maraqlı musiqili video çarxları yerləşdirmək də pis olmaz məncə…

Alətləri olmayan musiqiçi
this video removed from facebook..

Borularla musiqi..

1 toxunuşla musiqi.

  • follow @msadig